قد الحروف قصيدة تغنت بها اصاله ..
وايضا تغنى بها عبادي الجوهر..






قد الحروف
قد الحروف اللي في اسامي العاشقين بحبك
قد الثواني
والدقايق والسنين ،، بحبك
قد الهموم اللي في قلوب البشر
قد العيون اللي كحلها السهر
قد ما ليلي اشتكى من نار حبك ،،،
قد ما ليلي حكى عن طول بعدك

ليه القمر غالي عليا ؟؟
يمكن عشان في نوره وبعده في حاجه منك
ليه الشتاء ،،، في قلبي حزين ؟؟
يمكن عشان برضه بقساوته ،،، في حاجه منك
ليه السحاب بعشق بياضه ؟؟
يمكن عشان زي قلبي ،،، في قربي منك
ليه المطر ،، بيصعب عليا ؟؟
يمكن عشان يشبه دموعي ،،،، في بعدي عنك
ليه لما تبعد .... عن عنيا ،، بخاف عليك ،،، وبرضه منك
ليه لما اشوف في السماء نجوم كتير ،،، منها بغير ؟؟
يمكن عشان قد السماء وقد النجوم ،،، بحبك



__________________

مساء الخير

أٌلقى شاعرنا هذه القصيدة لأول مرة في أمسية جدة عام 1999م.

قام بغناء مساء الخير الأستاذ محمد عبده ولحنها الملحن صادق الشاعر





مساء الخير .. والإحساس والطيبة مساءٍ .. مايليق الا باحبابي
مساءٍ غير غصن لطير يحكيبه عن اللي مسكنه جفني واهدابي
هلا باللي احبه كثر تعذيبه وكثر ماهو يغيب وكثر ترحابي
حبيبي هو ولو ماقصّر الغيبة ولو عن بسمتي قد طوّل غيابي
اعرفه زين وعيتني اليبه عدوي يوم .. ويوم اقرب من اصحابي
ملكني بين ترغيبه وترهيبه يفارقني وهو واقف على بابي
به الصادق به الغارق باكاذيبه يبي بعدي .. ودمعه بلل ثيابي
به القسوة .. به الرقة. بهالهيبه به الضعف القوي به نشوة اغضابي
هلا باللي يصيب العطر بالريبة يقول العطر .. انا زايل ويبقابي
هلا باللي يقول الورد وش ليبه من المهدى ؟ .. انا او هو لأطيابي
هلا باللي عجزت ألقى عذاريبه هلا باللي تحبه .. كل أسبابي
مساءٍ فاق كل الشعر ترحيبه بجية من سكن جفني واهدابي
مساءٍ فاض بالإحساس والطيبة مساءٍ .. مايليق الا باحبابي







مذهله..


ألقى الشاعر هذه القصيدة لأول مرة في أمسية مصر 2002م.

وقد تغنى بها الفنان محمد عبده





مُذهلة .. !
ماهي بس قصة حسن ...
رغم ان الحسن فيها بحد ذاته .. مشكلة

مُذهلة ..
كل شي فيها طبيعي .. ومو طبيعي
أجمل من الأخيلة
طيبها .. قسوة جفاها ..
ضحكها .. هيبة بكاها ..
روحها .. حدة ذكاها ..
تملأك بالأسئلة ..
مُذهلة ..

مُذهلة ..
تملأك بالأسئلة ..
هي ممكنة والا محال ..؟!
هي أمر واقع .. أو خيال ؟!
هو سهلها صعب المنال .. ؟
أو صعبها تستسهله !

مُذهلة ..
تملأك بالأسئلة ..
ليه كل معجز مر هذا الكون .. فيها له صلة ؟؟
ليه كل شي فيها تظن انك تعرفه .. تجهله !؟
ليه كل (لا معقول) فيها ورغم هذا تعقله !؟
طيبها .. قسوة جفاها ..
ضحكها .. هيبة بكاها ..
روحها .. حدة ذكاها ..
تملأك بالأسئلة ..
مُذهلة ..

يا بدايات المحبة ..
يا نهايات الوله ..
كيف قلبي ما احبه ؟
وانتي قلبك صار له !
يا أعذب من الأمنيات ..
يا عالم من الأغنيات ..
يا أجمل الشعر البديع ..
من آخره لين أوله ..
ما راودتك الاسئلة ؟!
ليه عمري ما لقى لبرده دفى ..
الا دفاك ِ !
ليه قلبي ما بدقاته عزف لحد ٍ ..
سواك ِ !
ليه أنا عيني تشوف وماتشوف ..
الا بهاك ِ !

يا أجمل من الأخيلة ..
هذا جواب الأسئلة ..
كي تكوني من حنيني ..
وبس فيني .. ومو بدوني مُذهلة






قصيدة ماهو عادي..

بالفعل ماهي عاديه..

تغنى بها محمد عبده





كان هالليلة بهاكي ماهو عادي
كنتي انتي
وانتي لمّا تكوني انتي
ماهو عادي
كنتي إعجاز وسحرر
كنتي دنيا من طهر
كان نورك في جبين الكون بادي
كان في صمتك طرب
كان في عيونك شغب
كان حسنك للحسن يرسي مبادي
كنتي في أجمل حضورك
كنتي في أعدل غرورك
ولمّا طافتبي عيونك
واستقرت في فؤادي
كنت أنا اتخيلك
وكنت أنا أتأملك
كنت أنا أتأملك وأتخيلك
وأنتي معي
والكون هادي
كان إحساسي مهيب
كنت أحس اني مهاجر أو غريب
وانتي ياعمري بلادي


آه لو باكر لأمسي يلتجي
يترك الليلة ليالي ومايجي
آه أنا من غدر باكر كم أخاف
ياخذك مني وأنا لقلبي شغاف
حزنها في غيبتك مر وشجي
آه أنا من غيرك أنتي وش وجودي ؟
آه أنا كم أبي باكر لو تعودي
آه من ذكرى بتشعلبي سهادي
لمّا كنت أتأملك
ولمّا كنت أتخيلك
لمّا كنت أتأملك وأتخيلك
وأنتي معي
والكون هادي
كان إحساسي مهيب
كنت أحس اني مهاجر أو غريب
وانتي ياعمري بلادي

يا ملاذي ومنتهاي وأولي
إيه أحبك فوق ماتتخيلي
ليت أنا يا بعد قلبي لي قلوب
لجل مافي كل لحظة بك أذوب
كل إجاباتك أنا
لا تسألي
ما أبي شمسك يواريها مغيب
لو جروحي منك
مادودي تطيب
ياللي سعدك منتهى غاية مرادي
آه كم أشتاقلك
آه كم أحتاجلك
آه كم أشتاقلك وأحتاجلك
في القرب والا في بعادي

أنتي إحساسي الأكيد
وأنتي دمي اللي بيجري
في الوريد
أنتي ياعمري بلادي



قصيدة مااظن.. القاه في اول امسيه له بالبحرين وغنتها اصاله ..





ما أظن الصبح .. يدري بالليالي وماأظن الليل يعنيه الصباح
و ما أظن في يوم قد زارك خيالي وماأظنك حاسبٍ عمري اللى راح
ياقديم الظلم ما فارقت بالي ومافي بالك لي سوى هم وجراح
لو همومي تسعدك .. زد لا تبالي ولو معي اخطيت اطلبك السماح
تبعد دروبك اذا اقبل وصالي ولجلك دروبي يضيقبها البراح
رغم بعد البعد جرحك هو ظلالي كنك الرامي وفرقاك الرماح
يالغرام السجن والسجّان غالي والسجين يخاف إطلاق السراح
لو هو في الأوراق قدر الغصن عالي بتاخذ الاوراق اقدار الرياح
للكسر غصنك وانا يمضيبي حالي ولضمى اورقي خلق ربي قراح
بسبقك للصبح مليت الليالي واتركك في ليل ناسيه الصباح




قصيدة لجل اوصلك القيت اول مره في البحرين عام 95.. وتغنى بها عبادي..






َبفارق فراقك وبخنق عبرتي واجرّح اضمادي واسافرلك معك
بشد للماضي واقدم ساعتي واعاند اعنادي واقودك واتبعك
بجامل احزاني واجافي فرحتي واعادي خلاني واحبك واخدعك
بصير انا طبعك وأنتي طيبتي وبيحزنك ضحكي .. وهلّي بمدمعك
بسامر دموعي واعزّي ضحكتي
وبهدي انا ضلالي .. ضلال ٍ ياسعك
بلبس انا ذلك .. وقيسي عزتي وبتصيري ذنوبي وخيري بيطبعك
بحارب في ضعفي وافر في قوتي وإلى رضختيلي لموتي بدفعك
ولجل اللقاء برحل وتمضي رحلتي وإلى حصل شوفك بكون مودعك
اببعد واوصلك وبسبق خطوتي وبنثرك فيني وانسى اجمعك
بضم أنا هجرك في قربك وحدتي وتدلك عيوني وقلبي مضيّعك
واذا اضلمت دنياي بطفي شمعتي واذا كثر زادي بجوع وبشبعك
شردتي رقادي وسمعتي نضرتي وغمضت أنا عيوني لجل ما اسمعك
صرخت في سكوتي ولمستي صرختي
وقربتي وجهك لي لجل ما اصفعك
عند الحزن تثقل خطاكي دنيتي وعند الفرح قالت خطاكي مسرعك
قصيدتي يكفي .. غبية كذبتي حبيبتي آسف بخونك .. بس معك









قصيدة شهر.. ايضا القيت لاول مره في امسية البحرين..

وغناها عبادي




ياللي تحبيني شهر ..
ثم ٍ تجافيني شهر
ثم ٍ تحنيلي شهر .. وتفكري كيف الرجوع كذا شهر
وترجعيلي في شهر ..
ماقد خطر في خاطرك .. ان السنة اثنعشر شهر ؟!
وقتي معك نصفه هموم
ونصفه الباقي اسى .. ولو طبعك القاسي نسى
وبالصدفة جاء مرة صباح .. وكلمة منك فرحتني
لابد ما همس الجراح .. تسمعيني في المسا
ولو تعتب جروحي عليك .. وتشتكي منك إليك
بترجعي تحبي شهر .. ثم ٍ تجافيني شهر
ثم ٍ تحنيلي شهر .. وتفكري كيف الرجوع كذا شهر
وترجعيلي في شهر ..
ولا يجي في خاطرك ان السنة اثنعشر شهر

اعذريني لو اقول .. حبك نسى معنى الفرح
اعذريني لو اقول .. وشلون يذكرنا الفرح ؟!
مادام اذا كنتي قريبه .. كل تفكيري يكون ..
بُعدك متى ؟! .. وإلى بعتي ابلا سبب
الاكيد بترجعي .. بس الأكيد هذا متى ؟!
ولو تعب مني الصبر .. وملّ من صبري العذول
وقلت ياناس اسألوها .. الحب هو كله هجر ؟!
ردك يجيني في شهر ..
قالوا تقول :
" ماينتظر .. بس يشتكي !
يصبر عليّ .. ترى السنة اثنعشر شهر " ؟!

للشاعر قصائد اجتماعيه .. لم اتطرق لها.. اضعها لكم..





قصيدة ياكاعـــب...


هذه القصيدة عبارة عن مداعبة مع الجنس اللطيف بشكل ممكن ان يكون غير لطيف ابدا.




ألقى الشاعر هذه القصيدة لأول مرة في أمسية جدة 1999م

كما ألقاها في العديد من الأمسيات





يا كاعب الطبع الفريد
ياللي في صدقك تكذبي
يا أقدم الكيد الجديد
كيد انسجن منه نبي
يا جاريه تملك عبيد
يا مقيّده تسبي سبي
القوه في ضعفك تبيد
وسلاحك الدمع اسكبي
ما يعجزك قاسي عنيد
الكهل يصبح بك صبي
ينصاد ويظن انه يصيد
ويصدقك هذا الغبي
ويظن انه الفذ الوحيد
ما يدري انك تلعبي
مسكين هالجاهل بلييد
ظنك بوصله ترغبي
ان جاك اقفيتي بعيد
وان صد عنك تقربي
وان شفتي اخلاصه يزيد
في حيرتك تتقلبي
وان بان لك فجأة سعيد
من هالسعادة تغضبي
وان قلتي عني لا تحيد
وطاوعك تستغربي
وان قلتي فراقك أريد
وغاب عنك تندبي
ياطالب الراي السديد
يا حاير بطبع الظبي
أقرب من حبال الوريد
وابعد من المجد الأبي
وأوضح من أنوار ٍ تقيد
واخفى من النملة دبي
الشك فيها والأكيد
وغموضها به تختبي
شف فعلها يحكي ويعيد
الغدر شيمة مذهبي
زادي النكد به استزيد
والمكر صافي مشربي
البعض ينصاني مجيد
والبعض يحبيلي حبي
ضعفي قوي وذلي عتيد
يا ليت اعرف مأربي
شف فعلها برجل ٍ شديد
تلقى طلبك ومطلبي
تعطيه بعض اللي يريد
وتاخذ جميع اللي تبي
أستثني من هذا القصيد
كل النساء بكوكبي






قصيدة نحس


ألقى الشاعر هذه القصيدة لأول مرة في أمسية البحرين عام 1995م

كما ألقاها في العديد من أمساته



يوم الاثنين اغتنى .. وصار بين الاغنيا ترتيبه الثالث
يوم الثلاثاء الفجر .. مات في حادث


,,,,,,,,


فريق كورة .. دائما ً ترتيبه في الدوري الاخير
واذا لعبوا واستبسلوا .. قبل الاخير
وبعد السنين الممحلة .. جاهم رئيس ثروته كثر التراب
عيّن مدير .. عنده من الخبرة كثير
شال الكبار ولعّب شباب
وجاب المدرب اللي له اسم ٍ مهاب
واتقدموا .. وصلوا للدور النهائي
ويوم النهائي .. قبل المباراة بدقايق
في البلد حصل انقلاب


,,,,,,,,


مسكين .. شين وفقير
وفي الدراسة حاول انه يستمر .. ومااستطاع
وضعه صعب ..ابوه مات وهو صغير
وماترك له الا الفقر .. وامه واخته .. والهم من فوقه وتحته
ومالقى لجل الهروب من الضياع .. الا انه يدور وظيفة .. أي وظيفة
ولقى من ضيقته مخرج .. وظيفة دخلها معقول .. يمشـّي الحال لو اعرج
ومرت سنة وسنين ..
والمسكين .. صارت كل آماله زواج
واتزاحمت في داخله الاسئلة ..
منهي اللي بتقبله ؟ .. وليه ؟
وفي يوم مامثله ابد .. شافها .. اجمل من اجمل مارأى
واضحكتله ... مستحيل !! ...اضحكتله
ومشت من اول الحارة .. ولحقها
وادخلت في بيت جاره ..
سأل عنها وعرف ... قنوعة واسمها سارة
تصير اخت لمرة جاره
ارسل لها اخته .. تجس النبض
جت البشاير
راح لمه .. وفرحته كبر السما والأرض
وافقت !! .. ابشرك يمه .. لقيتها يمه
سارة اخت حصة مرت منصور ..
ابيها وهي تبيني .. وابغى منك الشور
خلاص يا يمه خلاص .. بقول لهمومي الوداع .. بقول لهمومي الوداع
قالتله امه :
يا ولدي .. بس هذي اختك في الرضاع






قصيدة(مشاهد) القاها لاول مره في امسية القاهره 2002 م..

المشهد الأول

تحضنه لجل تضحك للي وراه
وماهمها لو شافها ..
غايته اسمى كثير من العتاب ومن الغضب
تحضنه وفي بالها .. ذاك اللى اعطاها الرقم
في ليلةٍ كان النهار .. فيها بقايا سكرته
وللأسف انه نسي يكتب لها .. كم غرفته
تحضنه وفي يدها ساعة ذهب
كان اشتراها لها البارحه
لجل تعرف كم مساحه غرفته



المشهد الثاني

أربعة جالسين ..

كل اثنين متقابلين ..

ورق يلعبون ..

على اليمين هناك تلفزيون ..

سرى وأربعة .. خمسين .. أربعمية

صوت المذيع في التلفزيون

" موضوعنا اليوم عن الخريطة الجينية .. أعظم إنجاز في نهاية القرن العشرين "

- ألعب ياخي

- أصبر ياخي خلنا نشوف وش يقولون

- ألعب ياشيخ ألعب .. هاذول فاظين











مجلس رجال قصيده القاها الشاعر اول مره بجده 2000م ..




القصيده اجمل عند الاستماع من القراءه ..

مقاطع منها..

مجلس رجال
على اليسار مقلـّط .. وعلى اليمين صالة
ضيوف جالسين
قهوجي يلم الفناجين
وينطر اخر ضيف منهم يهز فنجاله
ضيف يقبل من بعيد
يقوم صاحب المجلس طلال لستقباله
شخص جالس على اليمين يهمس لجاره :
" هذا احمد اللي جاي بس ماهو لحاله "
" من معه ؟ "
" يبدولي اطفاله "
ويدخل احمد معه ثلاث اطفال
وعند باب الصالة يستقبله طلال
" السلام عليكم "
الكل يوقف
" هلا والله مرحبا عليكم السلام .. حي الله احمد هلا وسهلا .. تفضل .. كيف الحال ؟ "
" هلا طلال ..اعرّفك على عيالي .. ابني صابر عمره ثمان سنين .. لاتستحي سلّم ياصابر
بنتي هالة .. ست سنين .. سلم ياثامر على الجماعة .. وش هذا اللي في يدك ؟؟
اه .. سجايري والولاعة "
عبدالمعين يطالع الساعة .. ويهمس لجاره
" كيف يجيب اطفاله ؟! .. محد منا معه اطفاله .. ليش يجيب اطفاله "
ويجلس احمد ويجلس حوله عياله
طلال يقول :
" ما شاء الله .. ياحليلهم .. الله يحفظهم ويحرسهم ويحميهم
ماشاء الله يا صابر : ايش هالثوب الجديد "
احمد يقول وملىء وجهه ابتسامة
" هذا صابر موهوب في التقليد قوم ياصابر قلّد اصالة
والا تدري وري عمك كيف يركض سامي الجابر "
ينطلق صابر لخارج المجلس .. يرجع معه كورة يشوتها .. تنزل من السقف ثمان لمبات مكسورة
احمد يقول وملىء وجهه ابتسامة
" شاطر ياصابر ... شفت ياطلال شقاوة هالعيال "
طلال يتمتم :
" ياحليلهم .. الله يحفظهم ويحرسهم ويحميهم "
":
:
:
:
وترتسم على وجهة احمد علامة استفهام ويتساءل في داخله
" طلال كن وجهه متغير ..اكيد احد من هالضيوف زعله
مسكين طلال .. دايم في حاله مايخلوه .. زين جبت العيال سلوه "
ويخرج احمد من الصالة .. فخور بعياله
تارك وراه مجلس .... كان مجلس رجال
وعلى اليسار بقايا مقلط ... وعلى اليمين شبه صالة







قصيدة لي صاحب.. القيت لاول مره بجده 2000م..


استمع

لي صاحب ٍ مرة وأنا جالس معه

كان في بالي بداية فكرة لمطلع قصيدة

وكنت أحاول قد ماقدر .. شتات فكري أجمعه

أتذكر أنه قاللي في وقتها .. رغم اني ما كنت اسمعه

هالدنيا ذي مافيها شي مبهج

كل شي ممل .. أيامنا مثل الجرايد ..

كلها سواسيه

أتذكر اني وقتها تمتمت وقلت .. دونما تركيز

فعلا .. معاك حق .. هذي حقيقة قاسية

أتذكر انه قاللي .. رغم اني ماكنت اسمعه

حبيبتي مادري قست .. والا نست

أو انها متناسيه

أتذكر اني قلت له .. أيضا دونما تركيز

فعلا .. أكيد .. معاك حق .. فعلا ظروفك قاسية

أتذكر أنه قاللي وقاللي وقاللي

لين الشعر فيني تلاشى .. وقتها صرت اسمعه

كان يتأملني ويقول :

ليه الفرح دايم لأيامي يتحاشى

تبغوا الخلاصة القاسية ؟

صاحبي في يومها كم كان مزعج .. حيل مزعج

مثلما رنين الهاتف الجوال .. وسط هذي الأمسية








قصيدة كباريه ..






ازعاج .. صجة .. دجة
ايقاع خليجي غالبا ً مقلوب
ايقاع خليجي دائما ً مطلوب
شباب .. بنات ترقص .. والعطر في اول الرقصة حلو ..
وفي آخر الرقصة هبوب
غناء وطرب .. عرض وطلب
واحد يغني .. بدلته تلمع .. يُـفترض فنان
ياليلة دانة لدان
قرقعت كيسان .. دخان .. ما اسعد الشيطان
ضوء خافت .. كل شي حلو والضوء خافت
كل شي كذب والضوء خافت

وفي اطرف الصالة .. هناك اثنين .. واحد يقول :
- " شفت هاذيك الطويلة اللي ترقص " ؟
الثاني - " وين؟ "
- " هاذيك اللي مع حسين "
" واعدتها البارحة وجتني .. مالومها حبتني ..اعطيتها ألفين "
" مسكينة هي .. ماودها تجلس في ملهى .. بس انها تساعد اهلها "
:
:
:
:

غسان .. غسان .. مدير هالصالة
ركض غسان .. وصل فلان .. وصل المهاب .. معاه عشر اشخاص
ركض غسان " اهلين وسهلين ..شو هالحلو..يخزي العين "
الفرقة تنهي الأغنية .. وتعزف بسرعة ..
" حمد لله ع السلامة .. ياجاي من السفر "
أحلى طاولة للمهاب .. طاولة على البست
لفلان اللي من اسبوع كان لابس البشت ..
اليوم على البست






قصيدة مسرحيه ساخره .. بهو فندق ..


استمع

بهو فندق .. بلد غربي .. في فصل الصيف

على ميعاد أو صدفة .. جمع أجناس مختلفة

ولا فيهم أحد وافق .. أحد ثاني على تعريف للمنطق

بهو فندق .. فيه الناس مكتظة

فخامة تكسي الجَنبات

نادل يحمل الطلبات .. على أواني من فضة

هنا تجّار .. يحكوا أسهم وسندات

هنا سمسار .. هنا شاعر .. هنا بنيات

هنا فلكي .. هنا لاعب كره بارع

هنا فنان .. هنا متعهد السهرات

هنا يحكوا عن الأوضة .. هنا يحكوا عن الموضة

هنا يحكوا عن السادات

وبركن ٍ ماهو للصفوة .. بجنب الباب

كرسيين .. حوار يدور بين اثنين حيل أصحاب

ملامحهم تودي يم شرق أوسط

وهيئتهم وحالتهم .. بسيطة أو بعد أبسط

- شفّ سايح من اليابان .. يداعب آلة التصوير

يغازل آلة التصوير

- سايح هذا يا غلبان ؟

هذا السايح البارح .. كانت صورته تحكي

في صدر الصفحة الأولى

يقولوا خامس أغنى شخص في العالم

وأظن أنه .. وربي وحده العالم

جمع هالمال والثروة .. من استيراد أو تصدير

- نسى الكاميرا على الكرسي

- لا يا شيخ .. مثل هاذولا .. ما ينسوا

- صدّقني نسى الكاميرا على الكرسي

لا والله .. رجع خذها

ظنك وينهو رايح ؟

- أكيد يزور له متحف

سخيف .. وهوايته أسخف

- شفه مستني يمّ الباب

وش ينتظر ؟

- أظنه ينتظر تكسي

أقول عدنان : فاخر حيل هالفنجان

خذ شايك قبل يبرد

أقول أحمد : هذاك هناك .. هو منهو ؟

أي واحد ؟

هذاك اللي معه واجد

تخطرف أنت أو عميان

هذاك فلان
:
:
:
:


قوم نتصور معه

نقوم نتصور معه ؟

ما باقي سوى هذي

نكبّر راس هالمغرور

خفيّف انت .. وغبي أحمد

ودايم فيك هالعلة

أقول عدنان .. ترى صاير طويل لسان

أحمد ياخي لا تزعل .. ترانا اخوان

تعوّذ بس من الشيطان

وانا آسف .. وترى الدعوة سوالف

فخمه حيل هالكيسان

اشرب .. لا تزوّدها

ترى يبيّن عليك تعبان

شف مو هذي صاحبتك ؟

هلا والله .. إلا والله صاحبتي

تدري ..؟ تموت هي فيني

يا رجال .. خليني

خادعتك .. تراها والله خادعتك

أقول أحمد : عشان انسرقت فلوسك من زبيدة

صرت تشوف كل وحدة .. هي زبيدة

يا عدنان .. خادعتك

أنا قصدي لمصلحتك

شفها تكلم الرجّال

أي رجّال ! .. اخوها ذاك

يا عدنان .. خادعتك

أقولك ماتبي غيري

يا عدنان .. طع شوري

مشاعرها .. وهم .. كذبة

أحمد .. احترم نفسك

أفا عدنان .. تمد يدك علي

وهذي السبّه

صفعه دوّت بركن ٍ

قريبٍ من هل الصفوة

عِـراك في بهو فندق

جمع أجناس مختلفة

مافيهم أحد وافق أحد ثاني

على تعريف للمنطق

خارج صالة الفندق .. شرطيّين

يقودوا بالحديد اثنين

ملامحهم تودي .. يم شرق أوسط

وهيئتهم .. بسيطة أو بعد أبسط

كانوا أصحاب

في داخل بهو فندق .. بلد غربي

في فصل الصيف

فقير وعندي المال الكثير

فقير .. وملبسي غالي حرير ..

تعتبر من اشهر قصائد سمو الامير .. وحضت بشعبية كبيرة .. وطلب مستمر من الجمهور .

ألقى الشاعر هذه القصيدة في جميع امسياته تقريبا

كما ألقاها لأول مرة في امسية البحرين 1995 م






فقير وعندي المال الكثير
فقير وملبسي غالي حرير
ويا صاحبي الحافي الفقير
ابنشدك ابسألك وشهو الحصير !!
وابسألك وشلون انا امر وانهي
واذا حكيت قبل انتهي من كلمتي
يقاللي سم ويصير
ولاشكيت من غفلتي طوّل زمنها
يقاللي لاتشتكي .. ماخلقت الشكوى لأمير
وابسألك وشلون انا مع كل ذا .. اقول عن نفسي فقير ؟؟؟
ياصاحبي لاصار للضحكه ثمن
وصاروا اصحابي كثير بس بثمن
والوفاء مابه وفاء الا بثمن
ابسألك ماني فقير ؟؟؟
ولاصارت اقوالي حكم
ولاقالها غيري غدت حكيٍ قديم
ابسألك ماني فقير؟؟
ولاصرت انا مانيب انا
ولاغلطت قالوا صحيح .. وكل شي اعمله يصبح عظيم
ابسألك ياصاحبي ماني فقير؟
وياصاحبي ابنشدك لامن جفتني دنيتي
وابتدأ الدرب الطويل اللى ابد ماينتهي
وانتهي العز القديم وماكنت اظنه ينتهي
والموت بدد فرحتي .. وحطوني في قبر ٍ صغير
وحزنوا علي .. وبكوا هلي وناس من ربعي قليل
وارتاح من وجهي كثير
وبقيت وحدي في حيرتي مابه احد
لا طال عمرك ولا تحت امرك
ماغير انا وخوف ولحد وحساب قدامي عسير
وقتها ذكرت اني من زمان
يوم انه امهلني الزمان
هذا ظلمت .. هذا جرحت .. ياما كذبت
وذنوبي ماتحصي كثير
وقتها الىَ ندمت .. ونفسي كرهت
عرفت ان الله كبير وان الهلاك اصبح اكيد
واني انا مالي رجاء .. ولاهروب من الدجى
من الجحيم الا بأمل عندي وحيد
ان الله غفـّار ورحيم
ابسألك ياصاحبي عني أنا في وقتها
ماني فقير ؟




عـــجب عــجـاب..

قصيدة القاها الشاعر 95 م في امسية اليحرين..




عجب عُجاب
طيبة قلبها أبيض سحاب
أخلاقها مامثلها .. أخلاقها
أخلاقها تنتظر عشاقها
ومايجون .. !!
ياهي جريحة .. طيبة .. لكن قبيحة

عجب عُجاب
وسيم أنيق شاب .. كسبه حلال مشروع ماجرّب الجوع
ناجح مركزه مرموق
ورغم هذا الحزن ساكن عيونه
ماتت امه .. وحبيبته كانت تخونه

عجب عُجاب
كثر الفقر ماله
كل ٍ يبي قربه ورضاه
رغباته قوانين وزلاته صواب
الناس حوله من شمال ومن يمين
يأمر .. يطاع
الدول تحسب حسابه
والكل يخشاه ويهابه
لكن مريض ياعذابه
ممنوع ياكل لو أكل جايز يموت

عجب عُجاب
مرتاح الضمير لاسرق .. لاظلم .. لاحسد
عنده قليل أصحاب
قلبه كبير .. بيته صغير
والمرض عن صحته بعيد
عنده ثلاث اطفال
أحمد وإيمان ويزيد .. وامهم
وكثر السماء يحبهم
لكن فقير مالقا لصوته مسامع
مايملك الا طيبته وملح المدامع
ولو مادفع مبلغ حقير
ينطرد هو والعيال وامهم في الشوارع

عجب عُجاب
عبقري في الطب ملحد

عجب عُجاب
شاعر عظيم داخله فارغ

عجب عُجاب
أمير كذاب

عجب عُجاب
ملايين البشر .. تعبد بقر

عجب عُجاب
ماتصلي فرضها .. وتلبس حجاب

ياصاحبي عطني يقينك والظنون
من ودك تكون ؟!












صدّق أو لا تصدّق
كل ما تباعدت المسافة بين الرغيف والجوع
تلقى الفرح أصدق

صدّق أو لا تصدّق
لامن غدت كل المشاكل جوع الصغار وسقفٍ يداريهم قبل يصحى النهار
تلقى الشعور أعمق

صدّق أو لا تصدّق
كل ما انقفل درب انفتحت أبواب

صدّق أو لا تصدّق
لو فيه احد طيّب .. للطيبة أسباب

صدّق أو لا تصدّق
قليل من يعفي ويسامح .. كثير وده ينتقم
بس ينتظرله وقت سانح

صدّق أو لا تصدّق
القناعة كنز يفنى
ولو كل من ياخذ قنع .. وكل من ياكل شبع
كان الفرح غطى شوارعنا

صدّق أو لا تصدّق
كل النهايات البداية .. وأحلى البدايات النهاية
وكلنا رغم القساوة الظاهرة .. نبكي قدّام المراية

صدّق أو لا تصدّق
به مطوّل لحيته .. والثوب يلمس ركبته
وما قرا في الشهر آية

صدّق .. ان الشعر صدقه .. اعذبه
ودي احكيلك حكاية وقبلها ابغى لسؤالي اجوبة
المال هذا هو وسيلة والا غاية ؟!
لو ماهو غاية .. ليه الحروب ؟ .. ليه السلام اللي تمناه الشعوب ؟
ليه الحسد يملى القلوب ؟
وليه الفقير المُعدم الكادح .. بهجته تملى الملاح
لامن لقى ذاك الثري يعطي هاذيك المطربة مليون
وهذا الثري لامن سرى من حفلته .. وقفت سيارته عند الإشارة
وجاه شايب يطلبه .. الهم عاثي في وقاره
دق بـ اصابع مُتعبه .. على الشبّاك
قال : انا يا سدي مديون .. وانت الكريم
يحكون عنك في الجرايد .. وتقال في جودك قصايد
ويُقال انك للأرامل واليتامى عون
ما ابغى منك الا حاجة .. لبس الشتا لجل العيال
الله يسدد لك خطاك .. اعطني مما عطاك
واعتدل راعي الملايين الكثير في جلسته
وعقد حجاجه ثم قال :
ألا ما اثقلك واغباك .. ليه يا اخي ما تشتغل
انت كسول .. ومستغل
وطلّع من المحفظة فكّه .. رماها وقفل الشبّاك
ابغى لسؤالي اجوبة ...
ليه البر والتقوى .. مليان في جرايدنا ؟!
وليه هموم هالشارع ؟! .. بعيده عن قصايدنا ؟!
ليه الفساد .. ليه الكساد ؟!
وليه الحروب ؟! .. وليه الحسد مالي القلوب ؟!
وشهو الجواب ؟!
اتمنى انه مايكون المال هذا هو وسيلة ماهو غاية
هذي الكلمة النبيلة .. اخترعها أغنيا
لجل مسكين ٍ شقى .. يرضى بقليلة

وصدّق انت او لا تصدّق
ماني الشخص المثالي .. كل مافي الأمر اني شاعر ٍ ماهو يبالي
كان صار اللي اقوله علقم ٍ او صار حالي
كل مافي الأمر اني استريح .. لا مشابي مركبي عكس اتجاه الريح
وما ابرّي من الخطى نفسي ..
واللي اجاهربه مثل همسي
صدّق اني ماني الشخص المثالي
كل مافي الأمر اني اجمع احساس الحواري وسط صدري
وانقل الواقع لشعري
كل مافي الامر اني شاعر ٍ مطرود من جنة خيالي
صدّق اني ما قصدت اني اكون
صوت للي مايبون
صدّق اني ماني الشخص المثالي
والا تدري لا تصدّق






ارفع حجر تلقى مُغني ... اكتب شطر تصير شاعر
اكسب صحافة .. تصير سيّد للثقافة
جميل هذا الوقت مُحبط

اكتب بما يرضي ضميرك .. تصير حاقد
اشتم بحدة .. تصير ناقد
نافق بشدة .. يصير مستقبلك واعد
جميل هذا الوقت مُحبط

اسرق رغيفين .. تصير المجرم السارق
اسرق ملايين .. تصير الماجد الحاذق
جميل هذا الوقت مُحبط

اشرب على وقت العشا .. كاسة نبيذ
واسمع لشوبان .. وارقص الفالس .. تصير متحضر
اطلق اللحية ورتل القرآن وصل الخمس .. تصير إرهابي
جميل هذا الوقت مُحبط

اجرح يهودي .. تقوم هالدنيا وتقعد
اهتك اعراض .. ثكّل يتامى .. شيل بيت وامحي مسجد ... تنوم هالدنيا وتسكت
جميل هذا الوقت مُحبط

عيش هالعمر الوسيع .. وبعد ماتحياه موت
عيشوا هالعمر الوسيع .. وموتوا
الوعد يوم الوعيد .. يوم تنسى الام الطفل الرضيع
عظيم ذاك الوقت .. منصف

قصيدة احترامي للحرامي..




إحترامي .. للحرامي !!
صاحب المجد العصامي ..
صبر مع حنكة وحيطة ..
وابتدا بسرقة بسيطة ..
وبعدها سرقة بسيطة ..
وبعدها تَعدى محيطه ..
وصار في الصف الأمامي .. !
احترامي .. للحرامي .. !!

احترامي .. للحرامي ..
صاحب المجد العصامي ..
صاحب النفس العفيفة ..
صاحب اليد النظيفة ..
جاب هالثروة المخيفة ..
من معاشه في الوظيفة ..
وصار في الصف الأمامي ..
احترامي .. للحرامي .. !!

احترامي .. للحرامي ..
صاحب المجد العصامي..
يولي تطبيق النظام ..
أولوية واهتمام ..
ما يقرب للحرام ..
إلا في جنح الظلام ..
صار في الصف الأمامي
احترامي .. للحرامي .. !!

احترامي .. للحرامي ..
صاحب المجد العصامي ..
يسرق بهمة دؤوبة ..
يكدح ويملي جيوبه ..
يعرق ويرجي المثوبة ..
ما يخاف من العقوبة ..
صار في الصف الأمامي ..
احترامي .. للحرامي .. !!

احترامي .. للحرامي ..
صاحب المجد العصامي ..
صار يحكي في الفضا ..
عن نزاهة ما مضى ..
وكيف آمن بالقضا ..
وغير حقه ما ارتضى ..
صار في الصف الأمامي ..
احترامي .. للحرامي ..
احترامي للنكوص ..
عن قوانين ونصوص ..
احترامي للفساد ..
وأكل أموال العباد ..
والجشع والازدياد ..
والتحول في البلاد ..
من عمومي للخصوص ..
احترامي للصوص .. !!





قصيدة تعرض بعض القضايا الاجتماعية في حياتنا اليومية

ألقى الشاعر هذه القصيدة لأول مرة في أمسية جدة 99






العادة جرت
كل طالب مجتهد دمه ثقيل

العادة جرت
كل مخلص في الهوى حظه قليل

العادة جرت
العطوف اللي كريمٍ في الجرايد
في الأزقة والحواري له عوايد .. يصبح القاسي البخيل

العادة جرت
جُل من يصبح ثري .. يكتب شعر
والقصائد تحتري اغلى سعر
الشعر اصبح مجلة .. جلها غث وهزيل

العادة جرت
لمّا نسافر كلنا في الصيف .. نمشي مخشبين
كلنا نحكي بفخامة .. نمشي بفخامة .. والابتسامة لما نسّلم
نبتسم كأن فيه مصورين
ورغم اننا نسافر لجل نلقى بعض .. ونعرف بعض
الا اننا لما انتقابل نلتفت متجهمين
ماهو جنون .. ولا عبط
تظهر أغاني من نمط .. أربع سنين انتطالع بالعيون
وفي المواعيد اللي ماادري منهو كان العبقري اللي عطاها
نجلس في نفس الاماكن .. ننتظر نفس الوجيه
تظهر بكامل بهاها
ويبتدي ذاك الحوار السرمدي :
- شف هذاك شلون لابس .. ماهو صاحي
- شف هذاك موجود في كل النواحي
- شف هذيك شلون تضحك .. ياخزياه ياعيباه يالله
- شف هذيك شلون تمشي .. شف هذاك شلون جالس
- شف رفيقك .. ليش عابس ؟؟ خل نروح ونسأله
- لا انتظر هذا ماشي مع هله
وينتهي هذا الحوار السرمدي
فينا نقول : وش هالصخب .. هالديرة مليانه عرب !!
كأننا متفاجئين
ولما نرجع بالسلامة .. العادة جرت .. انا نكون متنكدين
ومافي سبب غير اننا ما كنا حنا
غير اننا لما نسافر .. دايم نكون ممثلين
ولجل نطلع من تقمص دورنا .. لما نرجع
نحتاج نقعد ناطرين أسابيع وأيام .. ونظهر من الانفصام

العادة جرت
انّا نجل الأجنبي .. ونقصي القريب

العادة جرت
انها الايام تمضي ومسجد الاقصى سليب

العادة جرت
كل ما جو الخليج صفي وراق
يبتدي العم سام .. عزف موال العراق

العادة جرت
كل ما اكتب قصيدة .. اوصف الواقع بها
القى جاهل ما اريده .. يعتقد انه لها

العادة جرت
كل ما اكتب يقيني أو ظنوني ..
يكاد المريب أن يقول خذوني

اضع بين ايديكم قصائد وطنيه نظمها الشاعر عبد الرحمن بن مساعد







احبك يابلادي..

لقيت لاول مره في اسية جده 2000م







أكثر من ريبة الفقراء ..

من ثري ٍ يجوب أشد شوارع المدينة فقرا

أكثر من حماقة الطغاة

إن هم صدّقوا كل المديح .. شعرا كان أم نثرا

أكثر من ظلم بعضهم .. عندما يغتال من قوت الحصار

لكي يبني قصرا

أكثر من دعاء بعضهم على بعضهم

فجرا كان ذلك ام عصرا

أكثر من انحناء هاماتهم إذا مر

وشتائمهم إذا أدبر

أكثر من فضول المتسكعين ..

إذا رأوا تجمهرا لاثنين أو أكثر

أكثر من نبل الملوك

وفضاضة العسكر

أكثر من نشوة الانتصار .. وقلق الهروب

وتلفت الخائفين

أكثر من صبر النساء .. وشماتة الأعداء

وهم الأغنياء .. ومن حقد الحاقدين في الأنحاء

والأرجاء

أكثر من استعمالنا لكلمة يقولون .. ومن تكيّف القانون

وممن جعلوا الدين كالثياب

أكثر ممن يبيعون المنابر .. ويشترون ذمم الكتاب

أكثر من كذب الشعراء .. وعظام المقابر

أكثر من تنهد السجناء .. وغموض المشاعر

أكثر من أنبائنا المحلية

وافتراءات منظمة العفن الدولية

أكثر من كل المظلومين صبرا

أكثر من كل المحرومين قهرا

أكثر من كل اللئام .. وسذاجة الإعلام

أحبك يا بلادي .. طوعا كان ذلك أم قصرا






السفينه .. القيت في امسية البحرين 99م

غناها عبادي الجوهر..






ماقد سمعتوا عن سفينة في بحر
والبحر موج متلاطم .. والخطر فيه متعاظم
ماسلم منـّه احد .. ماترك شي ٍ ابد
كودالسفينة وحدها
ماهزها موج البحر .. وان هزها
امسك بها ربانها
وابعد عن حماها الخطر .. بدينها وقرآنها
ماقد سمعتوا عن سفينة .. قويةٍ دايم عظيمة
بحرها هو الحياة والسفينة هي بلدنا
والفهد ربانها
ماقد سمعتوا من بنى هذي السفينة .. وكيف ؟؟
كانت غبار .. كانت جروح متناثره في كل صوب
ورغم الجروح جمّع شظاياها بيده
بامر العزيز
وافنى العمر ليل ونهار .. وارخص لها قلبٍ وروح
عبدالعزيز
عبدالعزيز اللي بنى هذي السفينة
اتعبت منه الدروب .. واشتكت منه الحروب
بالسيف ارسى شراعها
وبالحب قوى حبالها
ومن يومها .. رغم السنين .. تمضي السفينة في دربها
ماقد سمعتوا عن سفينة
قويةٍ دايم عظيمة
بحرها هو الحياة والسفينة هي بلدنا
والفهد ربانها
ماقد سمعتوا عن اهل هذي السفينة
عن كرم اهل السفينة .. عن وفاء اهل السفينة
وماقد سمعتوا عن قهر حسادها
وكيف انها للي نواها بالغدر ماتمهله
تجعله ذر ٍ هشيم مايمهله طوفانها
ماقد سمعتوا عن سفينة
ارفعت قدر البحر
ماقد سمعتوا عن سفينة
قويةٍ دايم عظيمة
بحرها هو الحياة والسفينة هي بلدنا
والفهد ربانها






جاكم الاعصار صيدة نظمها بمناسبة فوز المنتخب السعودي بكاس اسيا 88 م وغناها عبادي .





جاكم الإعصار ما شيٍ يعيقه
منتخبنا اليوم .. وخّر عن طريقه
هذا الاخضر لي لعب
جهزوا كاس الذهب
اذكر الله وشوف
وانسى الحذر والخوف
ما يعرف الخوف من هذا فريقه
لعبكم مغنى فيه المثل يضرب
ولفوزكم معنى .. الكل له يطرب
باخلاقكم نفخر مهما انتصرتوا
وما نطري غير الفوز .. لامن لعبتوا
من واجه الاعصار ..
مهما صمد .. ينهار ..
اذكر الله وشوف
وانسى الحذر والخوف
ما يعرف الخوف من هذا فريقه
خصمكم معذور لو ما يجاريكم
صقورنا يالخضر .. الله يقوّيكم
فن وعزم واصرار..
فيه الخصم يحتار ..
من يوقف الاعصار ..!
اذكر الله وشوف
وانسى الحذر والخوف
ما يعرف الخوف من هذا فريقه






قصيدة قبلوا تراب الوطن..

غناها محمد عبده





قبلوا تراب الوطن ... هذا الزمان أخضر
واشكروا مجزي النعم ... يزيدكم أكثر
كرامة ٍ عز ٍ وجود ... كثّروا لله السجود
وافرحوا بغيض الحسود ... واقهروه أكثر

من غيركم ... لاكبروا للحق
تلقاه قدام الصفوف
ومن غيركم ... خلىَ اللي في قلبه غدر
يسمع في ومض عيونكم ... حكي السيوف
من مثلكم ... قد ساعد الملهوف
من مثلكم ... ربي عطاه

ما مثلكم ... حفظتوا شرع الله
ومسجد رسول الله ...
وخدمتوا البيت العتيق
وما مثلكم ... الفعل يسبق قولكم
واللي معادي جمعكم ...
يعرف علو مقداركم
قبل الصديق ...
وإلهكم ....
وبيده التوفيق
قد زادكم ....
فيما عطاه








وغيرها الكثير..

لكني اخترت لكم مجموعه على ذوقي