قصيدة للشاعر فهد المفرج في ابنته بعد ماغابت عنه لفترة معينة، أتمنى أن تحوز على إعجابكم ..
ياريوف ياعلك بحالـي تروفيـن
لاقـل شوفي وانحنت بي عصايـه
يمين من نـزل تبـارك وياسيـن
أنك قمر عمري وكوكب فضايـه
أدراك بالخاطر وأعاملـك بالليـن
وأرجي عسى الله مايخيب رجايـه
أحب من حبك وأعادي المعاديـن
وأدعي لك الله بالستـر والهدايـه
فقدتك البارح وجريـت صوتيـن
هذي وهي ليلـة وعنـد نسبايـه
كله غـلا ياويلي أثـر الغـلا شيـن
الله وأسالـه لايبـيـن غـلايـه
من حبها حبيت كـل الصغيريـن
صارت محبتهـم بقلبـي هوايـه
عودتك الممشى علشـان تمشيـن
أشـد بالثنتيـن وأقصـر خطايـه
واليا بكيتي قمت أهلل وتصغيـن
وأحيان أغني لـك وأردد غنايـه
يضيق صدري لاسمعتـك تونيـن
وأجر صوتي من خلاي بخلايـه
وان جيت أبسهي عنك لديت بالعين
الدرب قدامـي وأطالـع ورايـه
رد الوفا ياريوف مابيـه هالحيـن
أبيـه لادارت علـيـه رحـايـه
أبيه لامن صارت العشـر ثنتيـن
اليا تركونـي عزوتـي واقربايـه
وأبيه لامنه غـدى الليـل ليليـن
لا اشتدت الأيـام وأظلـم سمايـه
وأبيه لا عـزوك فيـه المعزيـن
تدعين رب البيت يغفـر خطايـه
اليا كتب ربـي فـراق المحبيـن
ثـم دفنونـي لابتـي وأصدقايـه
توك صغيرة سن منتيـب تدريـن
والعالـم الله وش تكـون النهايـه
أما التفتي لي وزين علـى زيـن
وإلا رميتينـي بـدار الرعـايـه
وسلامتكم ،، وصح الله لسانك على قولة نجاح المداعيس 
04-06-2008, 07:20 مساء
