( رالي حائل )
( تحدى النفود الكبير )
( يا حائل العز )
وصلت بدري مع ان الامسيه جمعـه
عجلن على شوف من حبه شغل بالي
حايل غلى الروح ما يحتاج له رمعه
هي بسرة القلب هي همي وغربالـي
لولى دوامي تحررم عندي الرجعـه
لاشفت انا خشم سلمى قرب هبالـي
ولاشفت اجا محتفل والناس مجتمعـه
رفعت راسي فخر بمشمـخ جبالـي
يا حايل العـز والتاريـخ والرفعـه
ما هي غريبه ينظم وسطك الرالـي
الليدي بلنـت قالـت قمـة الروعـه
مستشرقه رايها مـا يقبـل جدالـي
دار الوفا والصفا والحـب والفزعـه
من قبل حاتم وهي مضرب للامثالي
مهد الكرم سمعته ما وازنـه سمعـه
ما نالـه اول ولا يحلـم بهـا تالـي
ما توجوها بتاج العـز بـا القرعـه
من خلقة الكون حايل راسها عالـي
ما يسكنه غير شهمن يفخـر بربعـه
ولا فارقه غير مجبورن مثل حالـي
من يولد بتربته معروف من طبعـه
مجبور يطلع عريب العـم والخالـي
قلبي ذرف بعدها دمعـه ورا دمعـه
طال انتظاري وقربه ما تهيـا لـي
اكابد الهم صـارت غفوتـي هجعـه
سجين غربه ذبحني جور الاغلالـي
يا ديرتي معدنـك مـا زينـه لمعـه
نفداه با الروح قبل الجـاه والمالـي
يا ما بليلي غديتي مثل اكا الشمعـه
وياما بحر القوايل صرتـي ظلالـي
صافي ينابيع فضلك تغري الكرعـه
قراح غيرك ملاح وحرملـك حالـي
عساك للسيل شعبانك علـى وسعـه
تضيق با الغيث من جالن الى جالـي
وتبدا شخاليل اجا تنساب من ضلعـه
ثلاثـة ايـام وبـل الغيـث همالـي
يا الطاهره يا الحنون السمحة الورعه
يا ما زبن في حماك من العرب جالي
جيتك وكلـي ولـه لبيتـك بسرعـه
تدللي فيه غيـرك عندنـا غالـي !
02-15-2006, 09:59 صباحا
رالى حايل"""""""""""""""
العرض المتطور
